मास्क तयार करण्याचे प्रात्यक्षिक

 कोरोना जागृती....
मास्क तयार करण्याचे प्रात्यक्षिक...

संपूर्ण जगाची झोप उडविणारा... काय आणि कसा आहे कोरोना वायरस?  कोरोना वायरस बाधित व्यक्तीचे लक्षणे, त्या अनुषंगाने करावयाचे प्रतिबंधक उपाय व प्रत्येकाने घ्यावयाची काळजी याबाबत सविस्तर माहिती विद्यार्थ्यांना देण्यात आली. कोणत्याही प्रकारचा गैरसमज न करून घेता अथवा घाबरून न जाता वैज्ञानिक दृष्टिकोनातून आरोग्याची काळजी घेणे आवश्यक आहे हे जाणिवपूर्वक नमूद केले आणि विद्यार्थ्यांनीही ते जिज्ञासूवृत्तीने समजून घेतले.

शेवटी प्रात्यक्षिक व प्रयोग म्हणून... आम्ही टिशू पेपर पासून मास्क तयार करण्याचा प्रयत्न केला आणि तो Successful झाला.सदर मास्क चेह-यावर अडकून मुलं एकमेकांना विचारत होती...कसा दिसतो?

आज नवीन आणि उपयुक्त वस्तू तयार केल्याचा आनंद लेकरांना झाला...आणि हेच आपले समाधान....

शाळा-ओझरखेड
ता. दिंडोरी

अचानक भरवलेली गणित कार्यशाळा...

अचानक भरवलेली गणित कार्यशाळा...

          नाशिक जिल्ह्याचे गणित मित्र आदरणीय वाल्मिक चव्हाण सर आज अचानक ओझरखेड शाळेत आले. सरांना बघून आश्चर्याचा धक्काच बसला. काही बोलण्याच्या आत चव्हाण सर म्हणाले, "सकाळी तुमच्या शाळेची बातमी वाचलेली होती. सुरगाणा येथे सुरु असलेल्या निष्ठा प्रशिक्षणास जात असताना मनात विचार आला की, आपले सर्वांचे अभिनंदन करावे म्हणून आलो. खरे तर या शाळेत गणित चळवळ सुरू करण्यासाठी मला यायचं होतं. आज योगायोगाने येथे येण्याचा योग जुळून आला." आम्हालाही आनंद झाला कारण चव्हाण सरांना मी याआधी शाळेत येण्यासाठी विनंती केली होती. सरांना दोन मिनिटांसाठी ऑफिसात बसण्यास सांगितले पण सरांनी तिथे बसण्यापेक्षा वर्गात जाऊ असे सूचविले.त्यांचा उत्साह पाहून मी विनंती केली की, एकाच वर्गात जाण्यापेक्षा सर्वांना मैदानात बोलावू का? त्यांचा होकार येताच काही  मिनिटातच मैदानात आसनव्यवस्था केली. आणि सुरू झाली चिमुकल्यांची गणित कार्यशाळा.....

           मण्यांची माळ सामोरे ठेवून ज्ञानरचनावाद पद्धतीने पुर्वानुभवांची सांगड प्रात्यक्षिकांची जोडून एकक, दशक पासून ते पाच अंकी संख्या गणनपर्यंत ज्ञानाची निर्मिती किती सहजतेने करून घेतली हे अर्ध्या तासात विद्यार्थ्यांना ही कळले नाही. या अध्ययन-अनुभूतीमध्ये सर्व विद्यार्थ्यांचा कृतीयुक्त सहभाग प्रश्नोत्तराच्या माध्यमातून मिळवला.
विशेष...

         यावेळी विचारलेल्या प्रश्नांची जास्त वेळा अचूक उत्तर देणारी इयत्ता चौथीतील विद्यार्थिनी गुंजन हिला गणित मित्र म्हणून घोषित करून तिचे अभिनंदन केले. स्वत:चा 'गणित मित्र' बॅज सरांकडून तिला देण्यात आला.यामुळे चिमुकली खूपच भारावली.

         यानंतर इयत्ता पाचवी ते सातवीच्या विद्यार्थ्यांसमवेत तीनच्या पाढ्यावर आधारित एक आनंददायी मोकळीका सादर केली, ज्यामुळे विद्यार्थी खूप आनंदी झालेत. अवघड वाटणारा गणित विषय सोपा असल्याचा अनुभव यावेळी विद्यार्थ्यांनी घेतला.

    या शाळेत गणित चळवळ उभारण्याचा मानस चव्हाण सरांनी व्यक्त केला ज्यास विद्यार्थ्यांनी होकार देऊन पुन्हा येण्याचा आग्रह धरत सरांचा होकार मिळवला.

         आमच्या शाळेतील चिमुकल्यांसाठी सरांनी दिलेली भेट निश्चित प्रेरणादायी ठरली आहे. करिता चव्हाण सरांचे मनःपूर्वक आभार.

विश्वास पाटोळे
शाळा- ओझरखेड

शाब्बास गुरुजी...!

प्रेरणादायी सन्मान......!

प्रेरणादायी सन्मान......!


       
         दिंडोरी : (17 फेब्रुवारी) मडकीजांब येथे आयोजित दिंडोरी तालुकास्तरीय शिक्षण परिषदेत आमच्या जिल्हा परिषद ओझरखेड शाळेला सन-2019-20 या वर्षांतील शैक्षणिक व सामाजिक कार्याची दखल घेऊन उपक्रमशील शाळा म्हणून तालुक्याचे गटशिक्षणाधिकारी आदरणीय श्री. बी. डी. कनोज साहेब यांच्या हस्ते सन्मानित करण्यात आले. याप्रसंगी शिक्षण विस्तार अधिकारी श्री. एस. पी.पगार साहेब, सौ.एस.एस.घोलप मॅडम व केंद्रप्रमुख पवार सर व्यासपीठावर उपस्थित होते.

          उपक्रमशील शाळेचे सन्मानपत्र स्विकारताना ओझरखेड शाळेचे मुख्याध्यापक श्री. पोपट भोये, पदवीधर शिक्षक श्री. विश्वास पाटोळे, श्री. प्रकाश भोये, उपशिक्षक श्री. तुकाराम राऊत, श्रीम.नलिनी बागूल, श्रीम.मनिषा वलंगे आदी......

ओझरखेड शाळेचा राज्यस्तरावर गुणगौरव....

Feeling good...!

 ओझरखेड शाळेचा राज्यस्तरावर गुणगौरव....

    पुणे येथील स्कायसायक्यू , रोटरी क्लब, वनराई, पराडकर फाऊंडेशन, स्वच्छ भारत, Gyan-Key, IISER , Big FM 95 यांच्या सहकार्याने दि. 14 व 15 फेब्रुवारी रोजी ....IISER पुणे कॅम्पस मध्ये  राज्यस्तरीय "घनकचरा व्यवस्थापन स्पर्धा" आयोजित करण्यात आली होती.
        2019-20 या शैक्षणिक वर्षासाठी संपूर्ण महाराष्ट्रभरातून 20000 पेक्षा जास्त विद्यार्थ्यांनी या स्पर्धेसाठी नोंदणी केली होती. त्यात उत्कृष्ट अशा 150 विद्यार्थ्यांना निमंत्रित केले होते. सदर 150 विद्यार्थ्यांमध्ये जिल्हा परिषद प्राथमिक शाळा ओझरखेड ता.दिडोरी येथील इ.6 वी ची विद्यार्थीनी कु.किर्ती भारत ठाकरे  व वर्ग शिक्षक म्हणून माझी निवड झाली होती.
    या स्पर्धेत आम्ही घनकचरा व्यवस्थापन अंतर्गत...टाकाऊ प्लास्टिक कच-यापासून तयार केलेला वाचन कट्टा व स्टूलच्या प्रतिकृतीचे सादरीकरण केले.

          या स्पर्धेतील अंतिम फेरीतील स्पर्धकांना
मा.रविंद्र धारीया..अध्यक्ष,वनराई
मा.प्रदीप लोखंडे...अध्यक्ष, Gyan-Key
मा.सानिका मॅम... RJ , Big FM 95
मा.जयप्रकाश पराडकर..पराडकर फाऊंडेशन,पुणे
मा.संगीता खडाळकर...रोटरी क्लब, पुणे
मा.ज्ञानेश्वर मोळककर -अतिरिक्त आयुक्त, पुणे
मा.दिप्ती व मोहन पुजारी..स्कॉयसायक्यू  फाऊंडेशन,पुणे
मा.अरूण कुदळे ..माजी प्रांतपाल, पुणे रोटरी क्लब.
मा.जिनेंद्र मुनोद... पुणे सेंट्रल रोटरी क्लब
यांच्या उपस्थितीत राज्यस्तरीय प्रमाणपत्र व स्मृतिचिन्ह प्रदान करण्यात आले. या वेळी स्कायसायक्यूच्या अध्यक्षा मा.दिप्ती पुजारी यांनी आमच्या गौरवाप्रसंगी ओझरखेड शाळेतील विद्यार्थ्यांचे व  शिक्षकांचे विशेष कौतुक करून अधोरेखित केले की, यांनी हा उपक्रम  केवळ त्यांच्या शाळेतच राबविला नाही तर संपूर्ण गाव प्लास्टिक कचरामुक्त करण्यासाठी झटत आहेत आणि खूपच गौरवास्पद कार्य आहे.

  या दोन दिवशीय स्पर्धा काळात विविध मान्यवरांचे विचार ऐकण्यासाठी मोठी संधी मिळाली. तसेच या संस्थाशी आमची शाळा जोडली गेल्यामुळे विशेष आनंद होत आहे.
  वरील सर्व संस्थांचे मनःपूर्वक आभार..!

ओझरखेडला लेकीच्या सन्मानार्थ घरावर नावाची पाटी....

ओझरखेडला लेकीच्या सन्मानार्थ घरावर नावाची पाटी....

 दिंडोरी, ता.3:  जिल्हा परिषद ओझरखेड शाळेत क्रांतिज्योती सावित्रीबाई फुले जयंती तथा बालिका दिनानिमित्त "करूया सन्मान लेकीचा" या उपक्रमाचे उत्साहात आयोजन करण्यात आले.
           प्रारंभी ढोल-ताशांच्या गजरात गावातून मुलींच्या सन्मानार्थ फेरी काढण्यात आली. फेरी दरम्यान 'लेक वाचवा, लेक शिकवा', 'मुलींचे शिक्षण, प्रगतीचे लक्षण', 'शिकलेली आई, घर पुढे नेई', अशा घोषवाक्यांनी परिसर दुमदुमून निघाला.
        रोजच सुंदर दिसणारी लेक आज सावित्री होऊन दारी अवतरली ती स्वतःच्या नावाची पाटी घेऊन. यावेळी पालकांनी लेकीचे औक्षण केले. त्यांच्या नावाची पाटी दारावर लावून आनंदोत्सव साजरा केला.आजच्या आश्चर्यकारक व सुखद अनुभूतीने आईंचे डोळे आनंदाश्रूंनी पाणावले.
       यावेळी शाळा व्यवस्थापन समितीचे अध्यक्ष व सदस्य उपस्थित होते. जिल्हा परिषदच्या विद्यमाने राबवलेल्या या अनोख्या उपक्रमाचे भरभरून कौतुक केले.
       सदर उपक्रमाच्या यशस्वीतेसाठी मुख्याध्यापक पोपट भोये व पदवीधर शिक्षक विश्वास पाटोळे यांनी विशेष परिश्रम घेतले.

निसर्गाशी मैत्री

निसर्गाशी मैत्री....

              माझ्या वर्गात "स्वच्छ शाळा, सुंदर शाळा" उपक्रम अंतर्गत स्वच्छता समिती तयार केली आहे. दररोज गटनिहाय विद्यार्थी वर्गाची स्वच्छता करतात. शाळेत येतांना त्या दिवशी वाराप्रमाणे निश्चित केलेली फुले वर्गात घेऊन येतात.
            आज पावसामुळे मुलांना फुले आणणे शक्य झाले नाही. पण आमच्या वर्गासमोर जास्वंदचे झाड आहे. परिपाठ सुरू होण्यापूर्वी त्या झाडाभोवती मुलं गोळा झालेली दिसली. जवळ गेल्यावर समजले आज त्या झाडावर टपोरी तितकीच देखणी फुले उमललेली होती. मुलं त्या फुलांना अंजारत होती...गोंजारत होती.
मी विचारले...काय करताएत तुम्ही?
मुलं उत्तरली...सर, आज जास्वंद चे फुले आणायची होती. पण गावात मिळाली नाहीत.
मग आता ?...मी विचारले.
मुलं दबक्या आवाजात बोलली.... "सर, हे फुले तोडूशे वाटत नाही, वर्गात नेण्यापेक्षा येथेच छान दिसून राहिले."
काही क्षणाचा विलंब न करता मी बोललो....Yes, you are right !.

मुलांनीही क्षणात टाळ्या वाजवून आनंद व्यक्त केला.

✍विश्वास पाटोळे
ओझरखेड ता.दिंडोरी

सीग्राम कंपनी मार्फत ओझरखेड शाळेत विविध स्पर्धांचे आयोजन...

सीग्राम कंपनी मार्फत ओझरखेड शाळेत विविध स्पर्धांचे आयोजन...

               शालेय ज्ञानाबरोबरच विविध स्पर्धांच्या अनुभवातून विद्यार्थ्यांच्या सुप्त कलागुणांना विकास व्हावा या उद्देशाने दिंडोरी तालुक्यातील सीग्राम कंपनीने सामाजिक बांधिलकी जपत ओझरखेडच्या शाळेत विद्यार्थ्यांसाठी विविध स्पर्धांचे आयोजन करण्यात आले.

         पहिली ते चौथीच्या विद्यार्थ्यांसाठी नृत्य- गायन, लिंबू-चमचा व संगीत खूर्ची तर पाचवी ते सातवीसाठी वक्तृत्व, चित्रकला व सुंदर हस्ताक्षर अशा सहा प्रकारच्या स्पर्धा घेण्यात आल्या. प्रत्येक स्पर्धेतील प्रथम ते तृतीय क्रमांकाच्या विजेत्यांना येत्या 15 ऑगस्ट रोजी मान्यवरांच्या हस्ते प्रमाणपत्र व बक्षीस वितरीत केले जाणार आहेत.

          या स्पर्धांचे आयोजन कंपनीच्या सीएसआर विभागातील कार्यकारी अभिषेक वाघमवार, कचरू आहिरे, प्रशांत मोरे, सोमेश्वर गांगुर्डे व सागर नाठे यांनी केले. स्पर्धांचे परीक्षक म्हणून शाळेतील शिक्षक प्रकाश भोये, तुकाराम राऊत, नलिनी बागूल व मनिषा वलंगे यांनी काम पाहिले. स्पर्धा समाप्ती नंतर सर्व विद्यार्थ्यांना चाॅकलेट व खाऊ चे वाटप कंपनीमार्फत करण्यात आले त्यामुळे बच्चे कंपनी अधिक खूष झाली....

श्री.विश्वास पाटोळे
शाळा - ओझरखेड

ओझरखेड शाळेत मुलांच्या हातात अवतरली अभासी सुर्यमाला

ओझरखेड शाळेत मुलांच्या हातात अवतरली अभासी सुर्यमाला....


     भूगोल विषयातील नेहमीच कुतूहल निर्माण करणारा घटक म्हणजे अवकाशातील आपली सूर्यमाला. सूर्याभोवती फिरणारे नऊ ग्रह व त्यांचे मानवी जीवनावर होणारे परिणाम, ग्रहांची परिवलन व परिभ्रमणाची कक्षा, त्यांचे सातत्य, त्यांचे वैशिष्ट्ये यासारख्या बाबींची माहिती समजून घेणे हा विद्यार्थ्यांसह सर्वांचा आवडीचा विषय आहे. म्हणून आज शाळेत मोबाईलमधील ॲप्लिकेशन Galactic Explorer for merge cube व QR कोड असलेल्या क्यूबच्या सहाय्याने 3D इफेक्ट सह सूर्यमाला प्रात्यक्षिक विद्यार्थ्यांना दाखविण्यात आले.
या प्रात्यक्षिक मध्ये सूरवातीला एका विद्यार्थीनीच्या हातावर merge cube ठेवल्यानंतर मोबाईलमधील ॲप्लिकेशनच्या सहाय्याने cube scan केल्यावर मोबाईलमध्ये cube च्या जागी म्हणजेच विद्यार्थ्यीनीच्या हातावर सूर्यमाला अवतरल्याचे दिसू लागले.सर्व मुलांनी मोबाईलमधील सूर्यमालाचे live प्रात्यक्षिक बघितले आणि सर्व आश्चर्यचकित झाले पण ज्या मुलीच्या हातावर cube होता तिला मात्र हातावर सूर्यमाला दिसली नाही.कारण ती फक्त त्या cube कडे पहात होती.पण जेव्हा तिला या प्रात्यक्षिकाचे recording व Screen shot दाखवले तेव्हा मात्र ती बुचकळ्यात पडली व आनंदाने हसू लागली.असे आश्चर्यकारक अनुभव विद्यार्थ्यांना देता-देता सूर्यमालिकेतील ग्रहांची सविस्तर माहिती देण्यात आली.

                  


या प्रात्यक्षिकमुळे सर्वांना सूर्यमाला जवळून बघता आली नव्हे तर प्रत्यक्ष  हाताळता आली. प्रत्येक ग्रहाचे सूक्ष्म निरीक्षण करता आले.

✍विश्वास पाटोळे.
   शाळा-ओझरखेड.

ओझरखेड शाळेतील विद्यार्थ्यांची नावे पोहोचणार मंगळावर....!

         'नासा' या अवकाश संशोधन संस्थेचे "मंगळ सोव्हर 2020" हे अंतरिक्षयान मंगळ ग्रहावर जुलै 2020 मध्ये झेपावणार आहे. या यानातील स्टेनसिल्ड चिपवर आपली नावे पाठवून, मानवी इतिहासातील परग्रहावर नावाच्या रूपात आपल्या पाउलखुणा सोडण्याची ऐतिहासिक संधी नासाने जगभरातील सर्वसामान्य जनतेला उपलब्ध करून दिलेली आहे. या सुवर्णसंधीचा लाभ घेत ओझरखेड शाळेतील शिक्षक विश्वास पाटोळे यांनी शाळेतील विद्यार्थ्यांची व शिक्षकांची नावे  https://mars. nasa.gov/participate/send your name/mars2020  या वेबसाईटवर नोंदवले होते. विद्यार्थ्यांच्या मनात अवकाश संशोधनाप्रती जागरूकता निर्माण करणे. चालू घडामोडी व शालेय शिक्षण यांचा समन्वय साधण्यासाठी सजग असणे हा या नाव नोंदणीचा मुख्य हेतू होता.  सदर नोंदणीचे बोर्डिग पास उपलब्ध झाले असून आज शाळा व्यवस्थापन समितीच्या हस्ते बोर्डिंग पासचे वाटप करण्यात आले. प्रत्येकाच्या हाती पास आल्यावर चिमुकल्यांनी एकाचवेळी आश्चर्य व आनंद व्यक्त केला.
                 "मंगळ रोव्हर 2020" हे यान Atlas V-541 या राॅकेटच्या मदतीने अमेरिकेतील फ्लोरिडा प्रांतातील सैन्य दलाच्या तळावरून 17 जुलै 2020 ते 5 ऑगस्ट 2020 पर्यंत लाॅन्च केले जाणार आहे, जे 2021 च्या फेब्रुवारीत मंगळावर पोहचेल. मंगळ मोहिमेअंतर्गत जगभरातील सुमारे दहा लाख नावे इलेक्ट्रॉनिक बीमचा वापर करून सिलिकॉनच्या चिपवर यानाच्या माध्यमातून पोहचवली जाणार आहेत.
            मानवी केसांच्या एक हजाराव्या भागाइतक्या ( 75 नॅनोमीटर ) रूंदीत  नोंदवलेली ही नावे स्टेन्सिल करून एक डेमी इतक्या आकाराची ही चिप रोव्हरवर काचेच्या आवरणाखाली जतन करून मंगळावर पाठवली जाणार आहे आणि जगासोबत या मोहिमेचे साक्षीदार असतील ओझरखेड शाळेतील चिमुकले.

 📝 विश्वास पाटोळे
       शाळा-ओझरखेड
       ता.दिंडोरी,जि नाशिक 

सायकल म्हणते, मी आहे ना...!

                पर्यावरणासाठी व वैयक्तिक आरोग्यासाठी सायकल चालवणे सध्या या धावपळीच्या जीवनात गरजेचे बनले आहे. म्हणूनच आधुनिक जीवनशैलीमध्ये सायकलिंगचे महत्त्व खूप वाढलेले आहे. लहान्यांपासून वृद्धही सायकल चालवू लागले आहेत. विशेष असे की अशा सायकलवरून जगाची सफर करणारे अनेक विक्रमादित्य होऊन गेले आहेत. विविध खडतर भागातील जागतिक सायकल स्पर्धा जिंकून अनेक मान्यवरांनी सायकलिंगचे विक्रम त्यांच्या नावावर केले आहेत. आणि हे नक्कीच कौतुकास्पद व गौरवशाली आहे.
        सध्या तर स्मार्ट सीटीने सार्वजनिक ठिकाणी भाडेतत्वावर सायकली उपलब्ध करून दिल्या आहेत. व्यायामाचे महत्त्व समजलेल्या व्यक्ती या सायकली चालून व्यायामाचा आनंद घेत आहेत.
    अशा या कमी खर्चिक व हितकारक  वाहनाचे आत्मकथन जाणून घेताना आमचे विद्यार्थी खूष....

जि.प.प्राथ.शाळा-ओझरखेड, ता. दिंडोरी
वर्ग- 6 वी
विषय-मराठी
उपघटक-सायकल म्हणते,मी आहे ना !

अध्यापन पद्धत - ज्ञानरचनावाद

1) पुर्वज्ञान - ब-याच मुलांच्या घरी सायकल आहे.सायकल खेळ म्हणून चालवतात. सायकल शिकताना आलेल्या गमतीशीर अनुभवांचे कथन.पहिल्या सायकल खरेदीचा आनंद... या सा-या अनुभवावर चर्चा.
2) पुर्वानुभवांशी ज्ञानाची सांगड - मुले कुटुंबियांच्या मदतीसाठी छोटी-मोठी कामे करण्यासाठी सायकलचा वापर करतात.
उदा. दुकानातून वस्तू विकत घेऊन येणे. भाजीपाला आणणे. दुध आणणे. मेडिकल वरून औषध-गोळ्या आणणे इ.
3) ज्ञानाची निर्मिती - सायकल चालवण्याचे फायदे ...

अ) वैयक्तिक फायदे -
1) माफक किंमतीत सायकल मिळते.
2) सायकल चालवण्याने व्यायाम होतो.  प्रतिकार शक्ती वाढते. वेगळा व्यायाम करण्याची आवश्यकता नाही.
3) शारीरिक व मानसिक आरोग्य सुधारते.4) मेन्टेनन्स् खर्च अत्यल्प.
5) सायकलीत बिघाड झाला तर हलकी-फुलकी असल्याने ने-आण करणे सोपे होते.
6) पार्किगसाठी जागा कमी लागते.

ब) सामाजिक फायदे -
1) अपघाताचे प्रमाण कमी असते.
2) गर्दीतही सायकल रेटून नेता येते. त्यामुळे वाहतूक कोंडीची समस्या जाणवत नाही.
3) महत्त्वाचे म्हणजे वायू प्रदुषण होत नाही.

क) राष्ट्रीय फायदे -
1) पेट्रोल व डिझेल या इंधनांची बचत होते.परिणामी देशाचे चलन वाचते.
2) परदेशातून जास्त प्रमाणात इंधन विकत घ्यावे लागत नाही.
स्वाध्यायः-
"""""""""""""""""""""""""""""""""""""""""""""""""""

         आज वर्गात प्रत्यक्ष सायकल आणल्यावर विद्यार्थ्यांना पाठाचा अंदाज आला. पण विद्यार्थ्यांचे पूर्वज्ञान जागृत करताना सायकलच्या भागांची नावे विचारले. तेव्हा एक-एक विद्यार्थ्यांने जे काही नावे सांगितले ते ऐकूण सर्व वर्ग हसून हसून थकला.हिच आजच्या दिवसाची  वैशिष्ट्येपूर्ण बाब ठरली...!
🙏🙏🙏🙏🙏🙏🙏🙏🙏🙏

📝 विश्वास पाटोळे
      शाळा-ओझरखेड

ओझरखेड शाळेतील विद्यार्थी होणार  संगणक साक्षर.....

            दिंडोरी तालुक्यात ओझरखेड शाळेतील शाळा व्यवस्थापन समिती व शिक्षक यांचेकडून राबविण्यात येत असलेला 'एक हात मदतीचा'... या उपक्रमात नाशिक येथील SAN COMPUTEK चे CEO मा.संजय चावला यांनी सामाजिक बांधिलकी जपत सहभाग नोंदवला.त्यांनी विद्यार्थ्यांच्या संगणक साक्षरतासाठी एक अद्ययावत संगणक संच सॅन चे सिनि.इंजिनिअर राहूल साळुंखे यांच्या हस्ते सुपूर्द केला.यामुळे शाळेतील विद्यार्थ्यांची संगणक शिक्षणाची समस्या सोडवली गेल्याने विद्यार्थ्यांना चेह-यावर आनंद झळकला.
          या प्रसंगी गावचे सरपंच गंगाधर निखाडे, तंटामुक्त गावचे अध्यक्ष भास्कर निखाडे, शाळा व्यवस्थापन समितीच्या अध्यक्षा सुरेखा शिरसाठ, शिक्षण समिती  सल्लागार आपा शिरसाठ, मुख्याध्यापक पोपट भोये, शिक्षकवृंद व विद्यार्थी  यांनी या मदतीचा स्विकार करून San Computek चे आभार व्यक्त केले.त्यांच्या या दातृत्वाचे सर्वत्र कौतुक होत आहे.

प्रवेशोत्सव...शाळेचा पहिला दिवस! 17 जून 2019
======================
जि.प.प्राथ.शाळा-ओझरखेड,ता.दिंडोरी

        दीर्घकालीन सुट्टीनंतर शाळेची घंटा झाली अनं चिमुकल्यांनी रंगीबेरंगी कापडं झुगारून शालेय गणवेश परिधान करत शाळेत हजर झाली. सिनिअर विद्यार्थ्यांना सोबत घेऊन नवागतांचे स्वागत त्यांच्या घरी जाऊन केले. लगेचच त्यांना ट्रॅक्टर ट्राॅलीत बसवून ढोल-ताश्याचा गजरात मिरवणूक काढली व त्यांना सन्मानाने शाळेत आणून प्रवेशित केले.
    शाळेतील वर्गात प्रवेश करण्यापूर्वी त्यांच्या पाउलखुणा कागदावर घेत असताना सुरवातीला नवीन चिमुकले घाबरले पण स्वतःच्या पाऊलांचे ठसे बघितल्यावर खुदकन गालात हसले. यावेळी उपस्थित असलेले शाळा व्यवस्थापन समितीच्या अध्यक्षा व सदस्य यांच्या हस्ते मोफत पाठ्यपुस्तकांचे वाटप करण्यात आले.
   

दुपारच्या भोजनात सोमवारच्या मेनूसह शिरा देण्यात आला. पहिलीच्या वर्गात गाणे- गोष्टी तर इतर वर्गात सराव अभ्याससह गप्पा-गोष्टी झाल्यात.खरेतर आज विद्यार्थी सकाळपासूनच शाळेत आलेले होते तरी सायंकाळपर्यंत फ्रेश दिसत होते. पहिलीच्या चिमुकल्यांची तर बातच न्यारी.पहिल्यांदा आठ तास नवीन वातावरणात वावरत होते.शाळेतील शिक्षकांनी नवागतांचे स्वागत करून आयुष्याच्या शिक्षण प्रवासासाठी मनःपूर्वक शुभेच्छा दिल्यात.

आम्हा सर्वांसाठी आजचा प्रवेशोत्सव आनंददायक होता.

           विश्वास पाटोळे 

               शाळा-ओझरखेड 

                        ता.दिंडोरी